ဒီ M74 ဂလက်ဆီကို တစ္ဆေ ဂလက်ဆီ (Phantom galaxy) လို့လဲနက္ခတ် ပညာရှင် တွေက ခေါ်ကြပါတယ်။ ဘာ့ကြောင့်လဲ ဆိုတော့ သူ့ရဲ့ မျက်နှာပြင် အလင်းရောင်ဟာ မှေးမှိန်တာမို့ တော်ရုံ တယ်လီစကုပ် နဲ့ဆိုရင် အလွယ်တကူ မမြင်နိုင် တာကြောင့် ဖြစ်ပါတယ်။
အခု ဂျိမ်းစ်ဝက်ဘ်က ပေးပို့လာတဲ့ ဓါတ်ပုံတွေဟာ James Webb ရဲ့ အနီအောက်ရောင်ခြည် ကင်မရာ တွေက ရိုက်ကူးထားတဲ့ ဓါတ်ပုံတွေနဲ့ သူ့အရင် ဟတ်ဘယ်လ် တယ်လီစကုပ် ကြီးကနေ သာမန် အလင်းလှိုင်းခွင် အတွင်း ရိုက်ကူးထား ခဲ့တဲ့ ဓါတ်ပုံတွေကို ပြန်လည် ပေါင်းစပ် ထားတဲ့ ပုံဖြစ်ပါတယ်။
ဒီ တစ္ဆေ ဂလက်ဆီကို ကောင်းကင်မှာ မိန်ရာသီခွင် (Constellation Pisces) အတွင်းမှာ ရှာဖွေ တွေ့ရှိ နိုင်ပါတယ်။ သူ့ရဲ့ ထူးခြားချက် ကတော့ ဂလက်ဆီရဲ့ ချပ်ပြား တစ်ခုလုံးဟာ ကမ္ဘာကို မျက်နှာ မူနေတာပဲ ဖြစ်ပါတယ်။ ဒါ့ကြောင့်လဲ သူ့ရဲ့ လက်တံတွေကို ကမ္ဘာက ကြည့်ရင် ထင်ထင်ရှားရှား မြင်တွေ့ကြ ရတာ ဖြစ်ပါတယ်။

ဂျိမ်းစ်ဝက်ဘ် ရဲ့ ပြတ်သားတဲ့ ဓါတ်ပုံမှာ ဒီ ဂလက်ဆီရဲ့ လက်မောင်းတွေ ထဲက ဖုန်မှုန့်နဲ့ ဓါတ်ငွေ့တွေကို ထင်ထင်ရှား မြင်တွေ့ ရပါတယ်။ ဂလက်ဆီရဲ့ ဗဟိုမှာ ဖုန်မှုန့် တွေ ကင်းစင် နေတာမို့ ဒီ ဗဟိုချက်မက ကြယ်အစုအဝေးကိုလဲ ထင်ထင်ရှားရှား တွေ့ကြရပါတယ်။
အခု ဓါတ်ပုံကို James Webb ရဲ့ Mid-InfraRed Instrument အနီအောက်ရောင်ခြည် ကင်မရာ ကနေ ရိုက်ကူး ထားတာ ဖြစ်ပါတယ်။ အနီအောက် ရောင်ခြည်မှာ အနီး၊ အလယ်ပိုင်း နဲ့ အဝေး ဆိုပြီး လှိုင်းခွင် ၃ ခု ရှိတဲ့ အထဲက အခု MIRI ကင်မရာဟာ အလယ်ပိုင်း လှိုင်းစဉ်တွေကို ဖမ်းယူ ရိုက်ကူးတဲ့ ကင်မရာ ဖြစ်ပါတယ်။ ဒီ လှိုင်းခွင်ဟာ စကြာဝဠာ အစောပိုင်း ကာလက ဖြစ်ပေါ်ခဲ့တဲ့ ကြယ်တွေ၊ ဂလက်ဆီ တွေဆီက ထွက်လာခဲ့တဲ့ အလင်းကို ဖမ်းယူဖို့ အကောင်းဆုံး ကင်မရာ ဖြစ်ပါတယ်။
အနီအောက် ရောင်ခြည် လှိုင်းတွေဟာ ကြားခံ လေဟာနယ် ထဲက ဖုန်မှုန့်တွေကို အလွယ်တကူ ဖြတ်သန်း သွားနိုင်ပါတယ်။ ဒါ့ကြောင့် ဂျိမ်းစ်ဝက်ဘ် ကနေ ရိုက်ကူးပေးတဲ့ ဓါတ်ပုံတွေဟာ သာမန် မျက်မြင် အလင်းကင်မရာ တွေက ရတဲ့ ပုံရိပ်တွေထက် ပိုပြီး ကြည်လင် ပြတ်သားပါတယ်။
ဒီလို ကြည်လင် ပြတ်သားတဲ့ အတွက် ဂလက်ဆီ တွေအတွင်းက ကြယ်သစ်များ မွေးဖွားရာ ရပ်ဝန်းတွေကို အတိအကျ ရှာဖွေ ပေးနိုင်မှာ ဖြစ်ပါတယ်။ ဒါ့အပြင် ဒီ ကြယ်စုတွေရဲ့ သက်တမ်း နဲ့ ဒြပ်ထုကိုလဲ ပိုမို တိကျစွာ တိုင်းတာ ပေးနိုင်မှာ ဖြစ်ပါတယ်။

ဒါတင် မက သေးပါဘူး။ မြေပြင် အခြေစိုက် ရေဒီယို တယ်လီ စကုပ်တွေ ကနေ ဖမ်းယူရရှိတဲ့ ပုံရိပ်တွေကလဲ အများကြီး တန်ဖိုးရှိတဲ့ အချက်အလက် တွေကို ပေးစွမ်းနိုင်ပါတယ်။
လျှပ်စစ် သံလိုက် လှိုင်းစဉ် (electromagnetic spectrum) ထဲက လှိုင်းအလျား နဲ့ ကြိမ်နှုန်း မတူညီတဲ့ ရေဒီယို လှိုင်း၊အနီအောက် ရောင်ခြည်၊ မျက်မြင် အလင်း နဲ့ ခရမ်းလွန် ရောင်ခြည်၊ X-ray လှိုင်းတွေ အားလုံးကို တယ်လီစကုပ် အမျိုးမျိုးနဲ့ ဖမ်းယူပြီး ပြန်လည် ပေါင်းစပ် ခြင်းအားဖြင့် ပိုမို တန်ဖိုးရှိတဲ့ အချက်အလက် တွေကို ရရှိ စေပါတယ်။
ဒီလို အချက်အလက် တွေကို တယ်လီစကုပ် တစ်ခု တည်းက ပေးစွမ်း နိုင်မှာ မဟုတ်တာကြောင့် နက္ခတ် ပညာရှင် တွေဟာ တယ်လီစကုပ် အမျိုးအစား မျိုးစုံ အသုံးပြုပြီး လေ့လာ ကြရတာ ဖြစ်ပါတယ်။
Ref: Webb inspects the heart of the Phantom Galaxy | ESA